45.சாதியாவ தேதடா சலந்திரண்ட

சிவவாக்கியர்
****************
45.சாதியாவ தேதடா சலந்திரண்ட நீரெலாம்
பூதவாச லொன்றலோ பூதமைந்து மொன்றலோ
காதில்வாளி காரைகம்பி பாடகம்பொ னொன்றலோ
சாதிபேத மோதுகின்ற தன்மையென்ன தன்மையே?

நீர் எங்கிருந்தாலும் அதற்குச் சாதி உண்டா? பொன்னால் செய்யப்பட்ட நகைகளைக் காதில், வாளி, காரை, கம்பி, பாடகம் என உருமாற்றம் செய்து அணிந்துகொள்கிறீர்கள். ஆயினும் அவைகளெல்லாம் பொன்னே.
இவ்வுடல் ஐந்து பூதங்களால் ஆகியது. இவ்வைந்து பூதங்களும் ஒன்றியபின்தான் உயிர் உண்டாகிறது. அது இருக்குமிடமும் ஒரு வாயில்தான்; அதுதான் நம் வாய்க்குள்ளேதான். நாக்கின் அடியின் உள்ள நரம்பு முடிச்சில்தான். இவைகளில் எல்லாம் சாதிவேறுபாடு எங்குள்ளது? பிறகு மற்றவைகளில் சாதிபேதம் பார்க்கும் தன்மையை என்ன சொல்வது?