2.ஓடியோடி யோடியோடி

2 .சரியை விலக்கல்
**********************

2.ஓடியோடி யோடியோடி யுட்கலந்த சோதியை
நாடிநாடி நாடிநாடி நாட்களுங் கழிந்துபோய்
வாடிவாடி வாடிவாடி மாண்டுபோன மாந்தர்கள்
கோடிகோடி கோடிகோடி யெண்ணிறந்த கோடியே.


சீவனாம் சிவன் தன்னுள்ளே ஓடி ஓடித் தன்னுள் கலந்துள்ள சோதியாய் உள்ளது. அதை நாடி நாடிக் கண்டுகொள்ள இயலாது வாழ்வின் நாட்களும் கழிந்துபோய், உடல் வாடி, உள்ளமும் நொந்து வாடி மாண்ட மனிதர்கள்(மனுக்கள்) கோடான கோடியாம்.

இன்னும்எளிதாய்ச் சொல்ல:

உடலின் உள்ளிருக்கும் ஏக இறையை இருக்குமிடத்தைவிட்டு உடலுக்கு வெளியே ஓடியோடி யோடியோடித் தேடி, கண்டவர் சொல்லுவனவற்றை நம்பி அதையே நாடிநாடிக் காலத்தைக் கழித்துக் கிட்டவில்லையே என வாடிவாடி மாண்டவர்கள் எண்ணிறந்த கோடியே.

ஆகவே பலப்பல அண்டங்களில் விரிந்து பரந்து வியாபித்திருக்கும் பரிபூரணத்தை நம் உடலுக்கு உள்ளேயே தேடிக் கண்டுகொள்ளல் எளிதாம்.

எண்சாண் உடலுக்கு சிரமே பிரதானம். ஆகவே உடலில் தேடுவதைவிட தலையில் தேடுவது இன்னுமெளிதாம்.