97.தன்னைத்தான் புகழ்வோருமந் தன்குலமே

விவேக சிந்தாமணி
*********************
97.தன்னைத்தான் புகழ்வோருமந் தன்குலமே
...........பெரிதெனவே தான்சொல்வோரும்
பொன்னைத்தான் தேடியறம் புரியாம
...........லவைகாத்துப் பொன்றினோரும்
மின்னலைப்போல் மனையாளை வீட்டில் வைத்து
...........வேசைசுகம் விரும்புவோரும்
அன்னைபிதா பாவலரைப் பகைப்போரு
...........மறிவிலாக் கசடராமே!

ஒருவன் மற்றவரால் புகழப்படுவதில்தான் சிறப்பு. ஆயினும், தன்னைத்தானே புகழ்ந்துகொள்வோனும், தான் சேமித்து வைத்த செல்வத்தில் தன்குடும்ப நலனுக்குப் போக மீதியைத் தானும் அநுபவிக்காது, அறச்செயல்களுக்குப் பயன்படுத்தாத கருமியும், மின்னலைப்போல அழகான இல்லாள் இருக்க விலைமாதரிடம் காம இன்பம் அநுபவிப்பவனும், அன்னை தந்தை ஆசான்(புலவர்) ஆகியோரைப் பகைப்பவனும், உலகோரால் அறிவற்ற கீழ்மகன் என்று அழைக்கப்படுவர்.