95.வல்லியந்தனைக் கண்டஞ்சி மரம்

விவேக சிந்தாமணி
********************
95.வல்லியந்தனைக் கண்டஞ்சி மரம்தனிலேறும் வேடன்
கொல்லிய பசியைத்தீர்த்து ரட்சித்தகுரங்கைக் கொன்றான்
நல்லவன் றனக்குச்செய்த நலமது மிக்கதாகும்
புல்லர்க டமக்குச் செய்தா லுயிர்தனைப் போக்குவாரே.

வல்லியம் = புலி
புலியைக் கண்டு அஞ்சிய வேடன், தன் உயிரைக் காத்துக் கொள்ள ஒரு மரத்தில் ஏறி ஒளிந்தான். அப்போது அவன் பசியை பழம் முதலியன கொடுத்து ஒரு குரங்கு தீர்த்தது. தன்னைக் காப்பாற்றிய அக்குரங்கையே நன்றி மறந்து வேடன் கொன்றான்.

அதுபோல், நன்றி கெட்ட அற்பருக்கு நல்லது செய்து உதவினால், அவர்கள் செய்நன்றி மறந்து உதவி செய்தவன் உயிரினை நீக்கிக் கொல்லுவார்கள். நற்குணமுடைய மனிதனுக்குச் செய்த நன்மையால் மேன்மை மேலும்மேலும் பெருகிக்கொண்டு போகும்.