8.ஐந்துருவா யுடலெடுத்த

ஞானம் எட்டி
***************

8.ஐந்துருவா யுடலெடுத்த வாறின் கூறு
............மசடில்லாத் தேகமெண்சா ணாத்துமக் கூறும்
விந்துதித்துச் சடமெடுத்த நாதக் கூறும்
...........விற்பனமாய்க் கடமுதித்த காயக் கூறும்
தந்திரமாய் நீர்க்குமிழி யான கூறுந்
...........தத்துவந்தொண் ணூற்றாறு சைலக் கூறும்
இந்திரியசுக் கிலசுரோணி தத்தின் கூறு
..........மியம்புதற்குத் தசநாடி யியல்பு காப்பாம்.

பஞ்ச பூதங்களால் இவ்வுடல் எடுத்த விதத்தையும், இவ்வுடலில் வந்திருக்கும் ஆன்மாவின் கூறும், விந்துநாதங்களால் எவ்வாறு தேகம் வந்தது என்பதையும், அப்படி வந்த உடற்கட்டுகளின் விதத்தையும், அது நீர்க்குமிழிபோல் அழிந்துபோகும் வகையையும், தொண்ணூற்றாறு தத்துவத்தோடு கூடியிருக்கும் விதத்தையும், சுக்கிலம் இப்படிப்பட்டது, சுரோணிதம் இப்படிப்பட்டது என்பதையும் நன்றாய் இயம்புதற்கு தசநாடிகள் காப்பாம்.

தொண்ணூற்றாறு ததுவங்கள்:

திருமந்திரம்:

“ஆகின்ற தொண்ணூறோ டாறும் பொதுவென்பர்
ஆகின்ற வாறா றருஞ்சைவர் தத்துவம்
ஆகின்ற நாலேழ்வே தாந்தி வயிணவர்க்கு
ஆகின்ற நாலாறை யைந்துமாயா வாதிக்கே.”

சுருங்கச் சொல்லின் சைவர்களுக்கு 36 தத்துவங்களும், வேதாந்திக்கு 28 தத்துவங்களும், வைணவர்களுக்கு 24 தத்துவங்களும், மாயாவாதிகளுக்கு 25 தத்துவங்களுமாம்.

சிவனின் திருவுளக் குறிப்பினால் முதற்காரணமாகிய மாயையினின்று காரியமாகத் தோன்றும் மெய்கள் 96 ஆகின்றன. இவைகளே 96 தத்துவங்கள்.

மேற்கூறிய சைவதத்துவங்கள் 36ல் ஆன்ம தத்துவம் 24, வித்தியா தத்துவம் 7, சிவதத்துவம் 5.

தத்துவங்கள் 96ன் விவரம்:

பூதங்கள் - 5
கர்மேந்திரியங்கள் - 5
கர்மேந்திரிய விடயங்கள் - 5
ஞானேந்திரியங்கள் - 5
தன் மாத்திரைகள் - 5
அந்தக்கரணம் - 5
நாடிகள் - -- 10
வாயுக்கள் - 5
உபவாயுக்கள் - 5
ஆச்ரயங்கள் - 5
கோசங்கள் - 5
ஆதாரங்கள் - 6
தோட(ஷ)ங்கள் - 3
ஈட(ஷ)ணாத்திரங்கள் - 3
குணங்கள் - 3
துர்குணங்கள் - 14
வினைகள் - 2
அவத்தைகள் - 5
-----------
ஆக மொத்தம் 96
-------------

தசநாடிகள்:

திருமந்திரம்:.

“நாடிகள் பத்தும் நலந்திகழ் வாயுவும்
ஓடிய காலில் ஒடுங்கி யிருந்திடுங்
கூடிய காமங் குளிக்கும் இரதமும்
நாடிய நல்ல மனமும் உடலிலே.”

நாடிகள் பத்து: விவரம்:

இடப்பால் நரம்பு, வலப்பால் நரம்பு, நடு நரம்பு, உள்நாக்கு நரம்பு, வலக்கண் நரம்பு, இடக்கண் நரம்பு, வலச்செவி நரம்பு, இடச்செவி நரம்பு, கருவாய் நரம்பு, எருவாய் நரம்பு ஆகியவை.

இவைகளை முறையே:

இடைகலை, பிங்கலை, சுழுமுனை, சிகுவை, புருடன், காந்தாரி, அத்தி, அலம்புடை, சங்கினி, குகு என்பர்.

அதேபோல் வளி பத்து:

உயிர்வளி, மலக்காற்று, தொழிற்காற்று, ஒலிக்காற்று, நிரவுகற்று, தும்மற்காற்று, விழிக்காற்று, கொட்டாவிக்காற்று, இமைக்காற்று, வீங்கற்காற்று என்பன.

இவற்றை முறையே, பிராணன், அபானன், வியானன், உதானன், சமானன், நாகன், கூர்மன், கிருகரன், தேவதத்தன், தனஞ்செயன் என்பர்.

இவ்விவரங்கள் அறிந்தவர்கள் சினந்தவிற்க. தெரியாதோர் குறித்துக் கொள்க. இவ்வெண்கள் எங்கெல்லாம் வருகின்றனவோ, அங்கெல்லாம் ஒப்பிட்டு நோக்க மெய்ப்பொருள் துலங்கும்.