72.மண்ணார் சட்டி கரத்தேந்தி

விவேக சிந்தாமணி
*********************
72.மண்ணார் சட்டி கரத்தேந்தி மரநாய் கௌவுங் காலினராய்
அண்ணாந்தேங்கி யிருப்பாரை யறிந்தோ மறிந்ததோ மம்மம்மா
பண்ணார் மொழியார் பாலடிசில் பைம்பொற் கலத்தில் பரிந்தூட்ட
உண்ணா நின்ற போதொருவர்க் குதவா மாந்த ரிவர்தாமே.

மண்ணால் செய்த சட்டியைக் கையிலேந்தி தெருநாய் விரட்டிக் காலைக் கெளவ, அண்ணாந்து பசியினால் ஏக்கமுற்று உணவு(பிச்சை) எங்கே கிடைக்கும் என வாடியிருக்கிற பிச்சைக்காரரைத் தெரிந்துகொண்டோம். அவர் யாரெனில், மனதை மயக்கும் இசை போல் சொற்களை உடைய மனைவியர், பொன் தட்டில் பால் சோற்றைத் தம் கணவருக்கு ஊட்டும்பொழுது, பிச்சை கேட்டு வந்த ஒருவருக்கு அன்னம் அளிக்காத மாந்தர் ஆவார். இவ்வளவு செல்வம் இருந்தும் பிச்சையிடாதோரே அடுத்த பிறவியில் பிச்சை எடுப்பவராம்.