67.மெய்யதைச் சொல்வாராகில் விளங்கிடு

விவேக சிந்தாமணி
********************
67.மெய்யதைச் சொல்வாராகில் விளங்கிடு மேலுநன்மை
வையக மதனைக்கொள்வார் மனிதரிற் றேவராவார்
பொய்யதைச் சொல்வாராகில் போசன மற்பமாகும்
நொய்யரி சியர்களென்று நோக்கிடா ரறிவுள்ளோரே.

உண்மைகள் பேசும் ஒருவரிடத்தே நன்மைகள் யாவும் அவரிடம் அண்டி ஒளிபெற்று விளங்கும். உலகிலுள்ளோர், அவரை மேன்மையுடையவர் என ஏற்றுக்கொள்வார். அஃதோடன்றி, அவர்கள், மனிதரில் தேவர்களைப்போல் விளங்குவர். மெய்கலவா பொய்யே பேசித்திரிபவர்களுக்கு, உண்ண உணவு கிட்டாது. அறிவுடைய ஆன்றோர்கள் அவர்களை நொய்யரிசி போன்ற அற்பர் என்று ஒதுக்கிக் கண்ணால்கூடத் திரும்பிப் பாரார்.