49.கழுதை காவெனக் கண்டு

விவேக சிந்தாமணி
*********************

49.கழுதை காவெனக் கண்டுநின் றாடியவலகை
தொழுது மீண்டுமக் கழுதையைத் துதித்திட வதுதான்
பழுதிலா நமக்கார் நிகராமெனப் பகர்தல்
முழுது மூடரை மூடர்கொண்டாடிய முறைபோல்.

அறிவற்ற மூடர்களை அவரினுந் தாழ்ந்த முழுமூடர்கள் கொண்டாடிப் புகழ்வது எவ்வாறாயின், ஒரு கழுதை காவென்று கத்தியதைப் பார்த்து அதற்கேற்ப நின்றாடிய பிசாசு திரும்பவும் அக்கழுதையைத் துதித்து வணங்கி மீண்டும் பாடச் சொல்ல, அதற்கு அக்கழுதையோ குற்றமில்லாக் குரலை உடைய நமக்கு ஒப்பானவர் யாருமில்லை எனச் சொல்வது போலாம்.